التثبيت والشرح

قبل ما تبدأ

اقفل بريمير وأفتر إفكتس. المثبّت بيكتب في مجلد الإضافات، والبرنامج وهو مفتوح بيقفل الملفات دي.

محتاج بريمير برو ٢٠٢٢ أو أحدث، أو أفتر إفكتس ٢٠٢٢ أو أحدث.

ويندوز

1. فك ضغط الملف اللي نزّلته. استخدم كليك يمين ‹ Extract All، أو 7-Zip. متستخدمش tar بتاع ويندوز — بيتخطى الملفات اللي أسماؤها عربي.
2. افتح المجلد اللي طلع، ودوس دبل كليك على INSTALL - تثبيت.bat.
3. لو ويندوز طلع رسالة “Windows protected your PC”، دوس More info ‹ Run anyway. دي بتظهر لأي ملف جديد مش متوقّع بشهادة مدفوعة.
4. استنى لحد ما يقول تم، واقفل الشباك.

ماك

1. فك ضغط الملف بدبل كليك.
2. دوس دبل كليك على INSTALL - تثبيت.command.
3. لو ماك قال إنه “مش متأكد من المطوّر”، افتح System Settings ‹ Privacy & Security، وانزل تحت، وهتلاقي زرار Open Anyway.
4. استنى لحد ما يقول تم.

افتح اللوحة

افتح بريمير أو أفتر، وروح:

Window ‹ Extensions ‹ Genius Motion

اللوحة بتفتح كشباك تقدر تركنه جنب أي حاجة. اسحبه من عنوانه وحطه جنب الـProject panel أو فوق التايم لاين.

حط المفتاح

أول مرة، اللوحة بتطلب منك حساب:

1. اعمل حساب بإيميلك.
2. حط مفتاح الترخيص اللي وصلك في صفحة الطلب.

المفتاح بيتربط بالحساب. تقدر تسجّل دخول بنفس الحساب على العدد المسموح من الأجهزة في باقتك.

لو اللوحة مش ظاهرة في القائمة

الترتيب ده بيحل ٩ من كل ١٠ حالات:

1. اقفل بريمير خالص واستناه يختفي من Task Manager (أو Activity Monitor).
2. افتحه تاني، وبص في Window ‹ Extensions.
3. لسه مش ظاهرة؟ شغّل المثبّت تاني وبريمير مقفول.

لو لسه، ابعتلنا ملف السجل من صفحة الدعم.

لو اللوحة فتحت فاضية أو بيضا

على الماك، ده معناه إن الملفات لسه متعلّم عليها إنها “جاية من الإنترنت”. المثبّت بيشيل العلامة دي؛ لو نسخت المجلد بإيدك بدل ما تشغّل المثبّت، شغّله.

الأدوات اللي محتاجة ffmpeg

قص الصمت والكابشن بيحتاجوا ffmpeg وffprobe.

• ويندوز: بييجوا مع الأداة، مش محتاج حاجة.
• ماك: لو مش متثبّتين، ثبّتهم بـHomebrew: brew install ffmpeg اللوحة بتدوّر عليهم لوحدها في /opt/homebrew/bin و/usr/local/bin. لو حاططهم في مكان تاني، اكتب المسار في الإعدادات.

إزالة

في نفس المجلد اللي فيه المثبّت: UNINSTALL - ازالة. بيشيل اللوحة وبيسيب المكتبة، عشان لو رجعت تثبّت متنزّلش تاني.